Իրականացվեց «Փորձի փոխանակում» ծրագիրը

Դսեղի ՀԵՆԱ-ն, ֆինանսավորում ստանալով Քաունթերփարթ ինթերնեշնլի կողմից, իրականացրեց «Փորձի փոխանակում» ծրագիրը: Այն բաղկացած էր մի քանի փուլից:

Առաջին փուլում հանդիպում կազմակերպվեց  Շիրակի մարզի Սառնաղբյուր և Լոռու մարզի Դսեղ համայնքների ՀԵՆԱ անդամների միջև: Այն մեծ հնարավորություն ընձեռեց երկու համայնքների երիտասարդներին ներկայացնելու միմյանց  կողմից իրականացված ծրագրերի մասին, կիսվել փորձով: Հանդիպման ընթացքում Սառնաղբյուրի ՀԵՆԱ համակարգող Կարեն Այվազյանը  «Առաջնորդություն» թեմայով  դասընթաց վարեց: Կազմակերպվեցին  գործնական աշխատանքներ ու խաղեր, որոնք  ավելի ամրապնդեցին  երիտասարդների ձեռք բերած գիտելիքները:

Ծրագրի հաջորդ փուլում Դսեղի ՀԵՆԱ-ան ձեռք բերեց տեխնիկան կարևոր սարքավորումներ՝  պրոյեկտոր և տեսախցիկ: Պրոյեկտորը  կծառայի սեմինարների անցկացման  և կինոդիտումների իրականացման համար: Տեսախցիկը կնպաստի առավել արդյունավետ լրահավաքում իրականացնելուն:

Ավստրիա-Հայաստան մշակույթների փոխանակման ճամբար Դսեղում

Դսեղում հուլիսի 14-21-ը , ավստրիացի երիտասարդ արվեստագետները անցկացրեցին  մշակութների փոխանակման ճամբար, որի նպատակն էր,  կատարողական սեմինարների միջոցով, ներկայացնել ավստրիական մշակութը, ինչպես նաև  ծանոթանալ հայկական մշակույթին: Այս նախագիծը  հնարավոր դարձավ իրականացնել «Երիտասարդությունը գործողության մեջ» ծրագրի շրջանակներում, որը ֆինանսավորվում է Եվրոպական միության կողմից: Ծրագիրն  մշակվել էր Դսեղում Խաղաղության կորպուսի կամավոր Մերի Էն Հարթիի և  ավստրիացի երիտասարդ արվեստագետ  Ֆաբիան  Շոլդայի ջանքերով:

Ավստրիացի 26 երիտասարդներ, մեկ շաբաթ շարունակ, բնակվում էին հայ ընտանիքներում, ինչը հնարավորություն էր տալիս ծանոթանալ ինչպես մշակութային կյանքին, այնպես էլ հայերի կենցաղավարությանը:

Այս ճամբարին մասնակցում էին նաև 30 դսղեցի երիտասարդներ, որոնց մեծ մասը համայնքային երիտասարդական նախաձեռնությունների ակումբի անդամներ էին:

Երիտասարդները մեկ շաբաթ շարունակ տքնաջան աշխատանքների մեջ էին, որի արդյունքն շատ չսպասեցրեց: Շաբաթվա վերջում նրանք հանդես եկան համատեղ ելույթով: Մասնակիցները հանդես եկան ինչպես պարային համարներով, երաժշտական կատարումներով, այնպես էլ  թատերական ներկայացումներով:

Ճամբարային օրերն անցկացվեցին Դսեղի հանրակրթական դպրոցի շենքում, որին մեծ աջակցություն ցուցաբերեց դպրոցի տնօրեն Էդուարդ Շեկոյանը:

ԹՈՒՄԱՆՅԱՆԱԿԱՆ ԱՇԽԱՐՀԸ ԵՐԿՈՒ ՑՈՒՑԱՀԱՆԴԵՍՆԵՐՈՒՄ

Դսեղի  Համայնքային աշխատանքային խումբը  Քաունթերփարթ Ինթերնեշնլի Համայնքային զարգացման «Մշակութային կյանքի ակտիվացում» ծրագրի շրջանակներում հունիսի 23-ին  հայտարարել  էր  "Իմ գյուղը " խորագրով լուսանկարների մրցույթ: Մրցույթին  մասնակցեցին բոլորը՝ առանց տարիքային սահմանափակման: Յուրաքանչյուր մասնակից  ներկայացրեց  մեկից մինչև երեք հատ նկար: Լուսանկարների մրցույթի արդյունքում ընտրված լավագույն աշխատանքներով պատվիրվեց ցուցատախտակ, որն  իր տեղը գտավ Դսեղի մշակույթի տան նախասրահում` մշտական ցուցադրության համար: Լուսանկարչական ցուցահանդեսի բացումն  անց կացվեց հուլիսի 19-ին Դսեղի մշակույթի տանը: Այդ օրը նաև դսեղցի, ԳԱԱ ակադեմիկոս Հանրի Ներսեսյանի  լուսանկարների «Թումանյանական աշխարհն այսօր» անհատական ցուցադրությունն էր, նրա նկարների հավաքածուն կազմված էր շուրջ 100 աշխատանքներից, որոնք հեղինակը նվիրեց մշակույթի տանը: Մշակույթի տան նախասրահը լի էր  հանդիսատեսով. այստեղ էին Քաունթերփարթ Ինթերնեշնլի Հայաստանյան գրասենյակի տնօրեն Կարլ Հոֆստրան և այլ ներկայացուցիչներ, համագյուղացիներ,  նաև Ավստրիայից Փորձի փոխանակման ծրագրով ժամանած 26 երիտասարդներ: Կարմիր ժապավենի կտրման արարողությունից հետո  ողջույնի և    շնորհավորանքի  խոսքերով ելույթ ունեցավ Դսեղի գյուղապետ պարոն Նորիկ Քոչարյանը: Միջոցառման նպատակն էր`  համայնքում մշակութային և արվեստագիտական  միջոցառումների խթանում, լուսանկարչական արվեստի նկատմամբ  հետաքրքրության բարձրացում: Միջոցառման վերջում հյուրերը հյուրընկալվեցին Հովհ. Թումանյանի տուն-թանգարանում, որտեղ կազմակերպվել էր հանդիպում «Գիքորի»  դերակատար Ալբերտ Ղուլինյանի հետ: