Վերջին շրջանում մեծացել է ուշադրությունը Դսեղում գործող նախադպրոցական ուսումնական հաստատության նկատմամբ, ինչպես համայնքապետարանի, այնպես էլ տարբեր հասարակական կազմակերպությունների կողմից: Անցած շաբաթ հաստատություն այցելեցին «Պարգևենք ժպիտ» երիտասարդական հասարակական կազմակերպության անդամները, ովքեր թխվածքաբլիթներ հյուրասիրեցին մանուկներին, ինչպես նաև նվիրեցին խաղալիքներ և զգեստներ: <<Ճիշտ է՝ դրանք ամբողջովին նոր չէին, բայց դա էլ մեծ օգնություն էր>>,-նշում է հաստատության տնօրեն Վ. Թումանյանը: Այժմ Դսեղի նախադպրոցական ուսումնական հաստատություն են հաճախում 41 երեխաներ: Շուտով կկազմվի երկու խումբ, որպեսզի երեխաների հետ աշխատելն ավելի դյուրին լինի: Բայց այսուհանդերձ հաստատությունը զերծ չէ խնդիրներից: Շենքը ունի վերանորոգման կարիք, չկան խոհանոցային և անկողնային անհրաժեշտ պարագաներ: Քաունթերփարթ Ինթերնեշնլի Քաղաքացիական հասարակության և տեղական ինքնակառավարման աջակցության ծրագրի շրջանակներում նախատեսվում է վերանորոգել և գույքով համալրել մանկապարտեզի շենքը: Ծրագիրը հաստատման փուլում է և հավանաբար հուլիսից կսկվեն աշխատանքները:
Շուրջ երկու ամիս է, ինչ Դսեղում գործող այս հաստատությունը անվճար է դսեղաբնակ երեխաների համար, բոլոր ծախսերը հօգում է համայնքապետարանը: Բայց հաստատության շենացմանը օժանդակում են նաև գյուղի բնակիչները` կամավոր սկզբունքով տարբեր աշխատանքներ տանելով մանկապարտեզի ներսում և հարակից տարածքում: Վերանորոգվել են կոտրված աթոռները, իսկ Համլետ Քոչարյանը, ում աղջիկը նույնպես այս նախակրթարանի սան է, հաստատությանը նվիրաբերել է տասը մանկական սեղան: Հաստատություն հաճախող մյուս երեխաների ծնողները պարբերաբար օժանդակում են բնամթերքով: Նորընտիր տնօրեն Վ. Թումանյանը հավաստիացնում է, որ կանի ամեն ինչ մանկապարտեզի հետագա աշխատանքները պատշաճ մակարդակով կազմակերպելու համար:
Комментариев нет:
Отправить комментарий